قصص العيادات والمعامل

أول يوم فتحت فيه عيادتى فى القاهرة

لقيت 3 مندوبين من مراكز أشعة و تحاليل عايزين يقابلونى,

بعد الكلمتين الحلوين على شوية حاجات علمية, لقيتهم بيقولولي, إحنا عندنا عرض لحضرتك,

كل مريض بيجي من طرفك, إحنا بنكتبه فى حسابك,

و آخر الشهر بتاخد نسبة من إللي بيدفعوا المرضى ........

رفضت بشياكة, و طلبت منهم بس يساعدوني مع المرضى الغلابة.........

قبلها كنت فاتح عيادة فى إحدى المدن, و بعد فترة من الشغل, لقيت مركز أشعة باعتلى هدايا رأس السنة, و فيها جنيه ذهب,

طبعاً رفضت....

فضلوا يتحايلوا عليا و يحاولوا يفهمونى إن دى هدية عادية لزوم المحبة.

و قعدوا يشرحولى ساعتها فوائد الهدايا و عدم حرمانيتها.....

بعد كده بقيت أطلب منهم تخفيض للمرضى الغلابة و كانو بيوافقوا................

و أنا طبيب مقيم, كان فى شركة عايزة توردلنا مسامير للعمود الفقرى, الشركة دى كان عندها عيب فى الخدمة أنا الوحيد إللى كنت فاهمه و أنا إللى بيطلع روحه فيه مع المرضى, بينما الشركات التانية مكانش عندها العيب ده,

طلبت منهم يصلحوا العيب و يوفروا الآلات اللازمة للمسامير و يسيبوها فى المستشفى علشان كده أفضل للمرضى،

لقيتهم بعدها بيكلمونى و بيقولولى إحنا حجزنالك فى مؤتمر فى العين السخنة, إنت و العائلة,

كان باين أوى إنها تضبيطة علشان أسكت............

الحمد لله مروحتش المؤتمر, و المستشفى إشترت المسامير من شركة تانية آلاتها متوفرة,

طبعاً هما كانوا عايزين يوفروا 50 ألف جنيه تمن الآلات فى مقابل ليلتين فى فندق ب 1000جنيه..........

و أنا فى الإمتياز, كنت بأشتغل فى شركة للآلات و المستلزمات الطبية, كنت بلف على مستشفيات الجمهورية, علشان أبيعلهم آلات جراحية و مفاصل صناعية,

روحت مرة لأستاذ كبير من باشاوات مصر,

دخلت عليه و عرفته بنفسي,

زعقلى و قالى إنت عارف إنت بتكلم مين,

قولتلوا طبعاً فلان الفلانى

قالى إنت عارف أنا تحت إيدى كام غرفة عمليات,

و عارف لو قررت أجهزهم حأجهزهم بكام؟

قولتلوا عارف

قالى و داخل عليا إيدك فاضية.........

مفهمتش قصده إيه !!!

رجعت لصاحب الشركة و حكيتلوا إللي حصل،

راح طلب منى أعرفله فاضل كام سنة للدكتور ده على المعاش:

سألت, عرفت إن فاضله 6 شهور بس,

صاحب الشركة قالى باللفظ, يبقى نستنى رئيس القسم الجديد....................

مواقف كتير يلتبس فيها الحق بالباطل

يا ريت منضحكش على نفسنا

{وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ}