انا أسمي هبة.. إقرا القصة

انا أسمي هبه

عندي ٣٣ سنه أم لولدين الحمد لله، من سنه بالظبط كانت كل حياتي ماشيه بصورة طبيعيه جدا وماكونتش بعاني من اي حاجه الا بعض التعب اللي بعد الولاده، وفجأه وبدون مقدمات لقيت نفسي مش قادره اعمل اي حاجه ولا اخد بالي من بيتي ولا ولادي، ودايما حاسه بارهاق وتعب

وكانت اول مره اتعب بجد كان يوم فرح اخويا اخر العنقود ووقعت في الارض وماحستش بالدنيا

ساعتها كان الكل ملاحظ اني خسيت جدا اكتر من ٧ كيلو في اقل من شهر

استنيت فرح اخويا يعدي وخبيت عن كل اللي حوليا اني تعبانه وبعد الفرح روحت لدكتور

طلب مني تحاليل عملتها بعدها طلب مني منظار

اول ما طلب مني كده فهمت ان اللي عندي مش حاجه بسيطه

وفعلا عملت المنظار وزي ما توقعت طلع ورم خبيث في القولون ومن النوع الغلس على حد قول الدكاتره يعني

وكان لازم إجراء عمليه على الفور

طبعا الخبر كان بالنسبالي مش مفجأه خالص وكنت بضحك ونزل عليا قناعه ورضا بقضاء ربنا ماكونتش متخيله ابدا اني هبقى بالهدوء ده والحمد لله

لكن الحاجه الوحيده اللي بكتني لما فكرت في ولادي

لكن بردو رجعت قولت ربنا رحيم بالعباد واكيد ربنا شايلهم الخير

الخبر ده كان زي الصاعقه على امي وجوزي واخواتي وكل اللي حوليا

وكنت كل ما الدكتور يقولي على حاجه وابص لامي اشوف في عنيها الحسرة والقهره اروح ضاحكلها ومضحكاها عشان اطمنها

وكنت دايما اهزر معاهم واقولهم عادي يا جماعه دول شوية سرطان على الماشي وهخف منه ان شاء الله

دخلت المستشفى وولادي اتفرقو عن بعض كل واحد في مكان وكانت ديه اكتر حاجه تعباني وخصوصا ان ابني الصغير كان لسه بيرضع وطبعا اتحرم من الرضاعه

اكتشفت بعد كده ان الورم في المرحله الثالثه وكمان تشعب شويه وان العمليه مش هتكون بسيطه

توكلت على الله وعملت العمليه وبعد ايام طويله في العنايه المركزه مش عارفه فيها النهار من الليل الحمد لله فوقت ولقيت حاجه غريبه في جنبي اليمين

عرفت بعد كده انها فاتحة اخراج جانبيه لانهم اضطرو يشيلو جزء من القولون والمستقيم والمراره و١٤ غده حولين الحوض وكان لازم يعملو الفاتحه ديه اللي بيسموها اليوستومي

بعد معاناه دامت شهور والحمد لله

اخيرا قدرت اتأقلم على الوضع الجديد واللي كنت عارفه انها فتره مرقته لحد ما اخلص علاج الكيمو وبعدين هعمل العمليه تاني

والدكتور وهو بيحكيلي وبيقولي احنا شيلنا المراره وشيلنا وشيلنا بصتله كده قولتله كان في حاجه بايظه تاني ؟؟؟ ضحك قالي ليه قولتله بعد كده اللي تلاقيه مش نافع شيله

والحمد لله كنت واخده الامور ببساطه لحد ما ابتديت العلاج الكيماوي وهنا بدأت المعاناه الحقيقيه

الالم والاحساس بالوحده والعظم اللي بحس انه بيتكسر نفسي مسدوده عن الاكل والدنيا كلها مش شايفه على طول تعبانه ونايمه

على طول حاله نفسيه سيئه جدا ومع ذلك كنت اروح الجلسه كنت بشوف في عيون كل اللي موجودين اني لسه صغيره اوي

وكنت انا بصبرهم

روحت قصيت شعري وصممت اتبرع بيه وكانت كل ما واحده من الستات الكبيره معايا في الجلسات تشتكي وتبكي ان شعرها وقع اروح قالعه الطرحه واقولها بصي انا شعري كان طويل وقصيته عشان كل ده مش مهم المهم اني اخف واربي ولادي

فضلت على الحال ده ٨ شهور والحمد لله

وبعد ما خلصت الكيماوي الدكتور قالي اني ممكن اعمل العمليه التانيه وخلاص وبعد كده اكمل العلاج الاشعاعي

روحت اعمل اشاعه مقطعيه واذا بالاشاعه تبين اني عندي مشكله ظهرت بعد العمليه وهي علميا اسمها ناصور بين المهبل والشرج وده بيسبب والحمد لله اختلاف في الوظائف

ضحكت كالعاده وقولت الحمد لله

كنت فاكراها عمليه بسيطه لكن طلعت عمليه كبيره جداااااا

وعملتها من شهر وبجد اتعذبت فيها جدااااااااا لانها عباره عن استئصال في الامعاد وتوصيل الجزء الي سبب الناسور ده غير جزء من الغشاء البريتوني وحاجات كده معقده كتير

والحمد لله دخلت من شهر عشان اعمل العمليه قالولي لا لازم تعملي عمليه بسيطه الاول نركب فيها دعامات الحالبين عشان نعمل العمليه من غير ما نيجي جنبهم ويبقو في امان سألت الدكتور طب هيتشالو امتى قالي بعد العمليه هتعملي عمليه تانيه تشيليهم فكان مني ضحكه كبيره جدا قولت يعني انا داخله اعمل عمليه بقو ٣ من يزود كله ضحك وكنت دايما اضحك مامتي اقولها ربنا اخد مني كل حاجه واداني الصحه

وعملت ال٣ عمليات طبعا بعد عذاب واديني اهو زي القرده وبكتب حكايتي ومستنيه اعمل اشاعه كمان شهر عشان اشوف العمليه نجحت ولا ايه ظروفها

وبعدها بشهرين ان شاء الله اعمل العمليه بتاعة الفاتحه الجانبية واخلص الاشعاع ان شاء الله

وعندي امل في ربنا كبيييييير اني هبقى زي الفل

وكل ده هيبقى ذكرى بحلوها وبمرها اتعلمت منها الحب والصبر والتضحيه من ناس وقفو جنبي واتعلمت ان ربنا اكيد له حكمه في كل تفصيله ولو كانت بسيطه اوي

دعواتكو معايا تكمل معايا على خير عشان ولادي محتجانلي وبجد اصعب اللحظات بجد عليا لما كان حد من عيالي يجري عليا عشان احضنه وانا مقدرش اشيله ولا احضنه من كتر الالم

والحمد لله والشكر لله على كل النعم اللي انا فيها

طولت عليكو جدا انا عارفه بس كان لازم احكي تجربتي يمكن تفيد غيري

دعواتي للجميع بالشفاء يا رب