النشرة الساخرة مع أيمن عطية ... ملخص أحداث أمس واليوم في مصر

النشرة الساخرة مع أيمن عطية ... ملخص أحداث أمس واليوم في مصر - وملخص أحداث أمس واليوم – يقدمها أيمن عطية وفيها:

  

١-  الصحة امبارح : تسجيل 523 حالة إيجابية جديدة بفيروس كورونا.. و 23 حالة وفاة (اى حد لم يصاب بكورونا حتى الان يعزل نفسه ، طالما مفيش أمل فى عزل المصابين ).

٢- وزير المالية يؤكد التعاقد مع وزارة الصحة لشراء 20 مليون جرعة من لقاح كورونا( اشترى يا باشا ٢٠ مليون لقاح صينى يعنى احنا هنعد وراك ؟).

٣- طارق شوقى: الوزارة معنية بوضع المناهج والامتحانات وليس أولياء الأمور (عاوز يقول لأولياء الأمور متحشروش مناخيركم فى اللى ملكمش فيه ، بس مش حابب يقل ادبه ... بنهدى النفوس بس ).

٤- زاهى حواس عن لعنة الفراعنة: كذبة مثل دعوة "يارب لو حد عملى حاجة ربنا ياخده" (ابو ظرافة خفة دم سعادة جناب اهلك ).

٥-  الحكومة تدرس إصدار قرار لتحصيل غرامات فورية من مخالفى الإجراءات الاحترازية (انتوا لسة هتدرسوا طبق يا باشا بدون دراسة طالما فيها فلوس ، هو انتوا هتحطوا حاجة فى جيوبكم لا سمح الله ؟).

٦-  الصين ترفع الكمية المطلوب استيردها من لقاح «فايزر» الأميركي إلى 100 مليون جرعة، ستتعاقد عليها شركة فوسين الطبية الصينية لترويجها داخل البلاد، وفق ما أفادت به وكالة رويترز (يعنى الصين تبيع لنا اللقاح بتاعها المضروب علشان تشترى لشعبها المصل الاصلى من امريكا).

٧- ألمانيا تبدأ اليوم تطبيق إغلاق صارم للحياة العامة لاحتواء كورونا (الألمان دول ناس فشلة معندهمش عجلة انتاج يخافوا عليها زينا ).

٨- الحكومة تنفي زيادة رسوم التقدم لامتحانات الثانوية العامة 2020-2021 (طب وليه فيه رسوم دخول امتحانات من الأساس ؟.. هو دا مش تعليم مجانى برضه ولا إيه ؟).

٩- الصحة العالمية تعتزم إرسال فريق بحثي للصين للتحقيق في كيفية انتقال كورونا للبشر (بعد إيه ؟ .. خراب مالطه ).

١٠- تعطل قطار في بنها لعدم وجود وقود (مش عارف مكبرين الموضوع ليه ؟ .. ما يقف السواق بجركن ويشاور لأي قطار ياخد منه كام لتر وقود يوصلوه لأقرب محطة بنزين يفول منها ).

١١- نيللي كريم: المشكلة كمان أن الفستان لما بنلبسه مرة على أي ريد كاربت لمهرجان، مينفعشي نلبسه تاني او نلبس حاجه شبهه (فعلا اللى يشوف بلاوى الناس تهون عليه بلوته).

١٢-الحكومة توافق على قرارات الإسناد بالأمر المباشر للشركات (ودا طبعا من ضمن سياسة مكافحة الفساد فقننا الاحتكار والاسناد المباشر ، احنا لسة هنعنل مناقصات وكلام فارغ).

١٣- وزير الأوقاف: من يرى معلم يتحدث عن حسن البنا يتقدم بشكوى رسمية فورا (عمى حسن بيبنى طوب ومسجله فى موبايلى باسم حسن البنا ، عادى ولا فيها مشكلة ؟).

١٤- كريستيز تبيع آثارا مصرية فى مزاد علنى بلندن غدا (مصر تروح تشتريها وترجعها تانى لمكانها ، ويقطعوا النور فى المطار ويهربوها من تانى علشان يبيعوها ونروح نشتريها ).

١٥- مصطفى مدبولي: عرض اشتراطات البناء فى صورتها النهائية على رئيس الجمهورية لاعتمادها (اشتراطات البناء الجديده

1. لاتقل المساحه عن 175متر

2. الشارع لازما يكون 8 متر

3. الواجه لازما تكون 10 متر

4. ثلاث طوابق للشارع 8 متر .

وابقى قابلنى لو عرفت تبنى قبل ما العاصمة الادارية تخلص ).

١٦- وزير التعليم: الحديث عن تسريب الامتحان أمر مضحك "لأننا نشرناه" (الترجمة : وانتوا رايحين كنا احنا راجعين ،، وسبقناكم بتسريب الامتحان قبل انتوا ماتسربوه).

١٧- الحكومة تقر عقوبة الحبس والغرامة لمن يُصور المتهمين إعلاميا قبل صدور حكم بات (كلام جميل ، بس عندى استفسار هى الحكومة اللى بتقر القوانين ام مجلس النواب ؟).

١٨- رئيس مجلس النواب: لو لم يكن الاقتصاد المصرى قويا ما استطاع مواجهة كورونا ( لولا كورونا كنا اكتشفنا علاج لكوفيد ١٩).

١٩- رئيس هيئة الانفاق: مشروع المونوريل نقله نوعية وحضارية ويختصر 30 ساعة (ربنا يستر ومايختصرش العمر كله).

٢٠- مستشار الرئيس: مصر تنبأت بانتشار كورونا واستخدمنا علاجات قبل العالم (انتوا هتموتوا الناس من الضحك ، هتبقوا انتوا وكورونا علينا).

٢١- أول تحرك حكومي بعد بيع 14 قطعة أثرية مصرية في مزاد كريستيز البريطاني (اللى بيسافر برة مصر بيقلعوه ملط فى المطار ، اومال الحاجت دى خرجت ازاى ... قطعوا الكهرباء).

٢٢- زوج يطالب بإثبات نشوز زوجته:" تطالبنى بسداد ثمن خدمتها بالمنزل"، (طالما انت بنفسك شايف انها بتخدم فى البيت يبقى تدفع، انت مش متزوج خدامه بروح امك).

٢٣- الأرصاد تكشف صورة من الأقمار الصناعية لعاصفة تصل بسرعات الرياح لـ50 كم فى الساعة (اليوم العالمى للطيران بالرياح، ربنا يستر وطلعوا كذابين).

٢٤- وزير التعليم: طلاب أولى ثانوى قادرون على التكيف مع جميع الوسائط الجديدة، (ربنا يتولاهم برجمته).

٢٥- فيفى عبده تطمئن جمهورها: "أنا كويسة وبحب الرقص".. وطبيبها: هترجع أحسن من الأول (يعنى هترجع ترقص احس من الأول ، اه وماله ارقصي لغاية ما ربنا ياخدك).

٢٦- عشان يورثوا.. 4 أبناء يستخرجون شهادة وفاة لأبيهم وهو على قيد الحياة.. (معرفتش تربي ولادك يا حاج).

والسلام عليكم ورحمة الله وبركاته